திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special
Nandhinipriya Ganeshan Updated:SHARE
![திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special](https://www.searcharoundweb.com/assets/uploads/news-14568.jpg "திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special")
Representative Image.
ஆண்டாள் பாடிய முப்பது பாடல்களே ‘திருப்பாவை’ என்று அழைக்கப்படுகிறது. இந்த பாடல்கள் ஆண்டாள் பாசுரம் என்றும் வழங்கப்படும். இந்த திருப்பாவை பாடல்கள் அனைவராலும் மார்கழி மாதத்தில் தினமும் பாடப்படும் முக்கிய பாடல்களாகும். அதிலும் திருமணம் ஆகாத பெண்கள் மார்கழியில் திருப்பாவை பாடுவது என்பது மிகவும் விசேஷம். அது அவர்களுக்கு நல்ல கணவனை பெற்றுத் தரும். அந்தவகையில், மார்கழி மாதத்தின் 21வது நாள் பாடவேண்டிய திருப்பாவை பாடல்.
திருப்பாவை பாடல் 21:
ஏற்ற கலங்கள் எதிர்பொங்கி மீதளிப்ப
மாற்றாதே பால்சொரியும் வள்ளல் பெரும்பசுக்கள்
ஆற்றப் படைத்தான் மகனே! அறிவுறாய்
ஊற்ற முடையாய் பெரியாய் உலகினில்
தோற்றமாய் நின்ற சுடரே! துயிலெழாய்
மாற்றார் உனக்கு வலிதொலைந்துன் வாசற்கண்
ஆற்றாது வந்து உன்னடி பணியுமாப் போலே
போற்றியாம் வந்தோம் புகழ்ந்தேலோர் எம்பாவாய்.
![திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special](https://www.searcharoundweb.com/assets/uploads/news-sub-145681.jpg "திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special")
Representative Image
பொருள்:
வள்ளலைப் போல கேட்டதும் பாலைப் பொழியும் பெரும் பசுக் கூட்டத்தைக் கொண்ட நந்தகோபரின் திருமகனே, அடியவர்களைக் காக்கும் அக்கறை உடையவனே, பெருமைகளைக் கொண்டவனே. இந்த உலகின் நிலையான சுடர் ஒளியே. நீ உறக்கத்தை விட்டு எழுந்து வருவாயாக. உன்னிடம் போரிட்டு உனது வலிமைக்கு முன்பு நிற்க முடியாமல் தோற்றவரெல்லாம் உனது அடியாராக மாறி உன் அடி பணிந்து வந்து நிற்கிறார்கள். அவர்களுக்கு உனது அடிகளைப் பற்றிப் பணிந்து நிற்பதைத் தவிர வேறு வழியில்லாத நிலை.
அதேபோல ஆயர் குலத்தைச் சேர்ந்த பெண்களாகிய நாங்களும், உனது குணநலன்களைப் போற்றிப் பாட வந்து உன் மாளிகை முன்பு காத்திருக்கிறோம். துயில் எழுந்து வந்து எங்கள் வேண்டுகோளை ஏற்பாயாக.
![திருப்பாவை பாடல் 22: அங்கண்மா ஞாலத்தரசர்.. [பாடலும் விளக்கமும்] | Margali Special](https://www.searcharoundweb.com/assets/uploads/news-14609.jpg "திருப்பாவை பாடல் 22: அங்கண்மா ஞாலத்தரசர்.. [பாடலும் விளக்கமும்] | Margali Special")
![திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special](https://www.searcharoundweb.com/assets/uploads/news-sub-145682.jpg "திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special")
Representative Image
விளக்கம்:
இந்த பாசுரத்தில் மன்னாதி மன்னர்களெல்லாம் உன் காலில் விழ காத்துக் கிடப்பது உன்னிடமுள்ள பயத்தால்! ஆனால், நாங்கள் அவர்களைப் போல பயந்த சுபாவம் உள்ளவர்கள் அல்ல! நாங்கள் வா என்று அழைத்தால் நீ வந்தாக வேண்டும். வர மறுத்தால், உன்னை எங்கள் அன்பென்னும் கயிறால் கட்டிப் போட்டு விடுவோம்.
அப்போது, நீ தப்பவே முடியாது என்கிறார்கள் ஆயர்குலப் பெண்கள். ஆம்...ஆண்டாள் மாலைக்குள் புதைந்து கிடந்த ஒரு தலைமுடியால் அவனைக் கட்டிப் போட்டு விட்டாளே! அந்த ரங்கநாதன் அவளிடம் வசமாக சிக்கிக் கொண்டானே! இதுதான் பக்தியின் உச்சநிலை. பகவானிடம் நம்மை அர்ப்பணித்து விட்டால், அவன் நம்மிடமிருந்து தப்பி ஓடமுடியாது என்பது இப்பாடலின் உட்கருத்து.
![திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special](https://www.searcharoundweb.com/assets/uploads/news-sub-145683.jpg "திருப்பாவை பாடல் 21: ஏற்ற கலங்கள் எதிர்பொங்கி.. [பாடலும் விளக்கமும்] | Margali Special")
Representative Image
மார்கழி மாதத்தில் திருப்பாவை பாட வேண்டிய காலம்:
மார்கழி மாதம் அதிகாலை 4.30 மணிக்குள் எழுந்து நீராடி, கோவிலுக்கு சென்றோ அல்லது வீட்டில் இருந்தபடியோ திருப்பாவை பாடலை தினமும் மூன்று முறை பாராயணம் செய்ய வேண்டும். திருப்பாவை பாடல்களை முழுமையாக அல்லாமல், மார்கழி மாதம் முழுவதற்கும் வருமாறு ஒரு நாளைக்கு ஒரு பாடலாக, அந்த ஒரு பாடலை மூன்று முறை பாடவேண்டும்.
இத்துடன் தினமும் வாரணமாயிரம் பகுதியில் இருந்து, ‘வாரணமாயிரம் சூழ வலம் வந்து, மத்தளம் கொட்ட வரிசங்கம் நின்றூத..’ உள்ளிட்ட பிடித்தமான பாடல்களையும் துதிப்பாடல்களாக சேர்த்து பாட வேண்டும்.
உடனுக்குடன் செய்திகளை தெரிந்துக் கொள்ளவும், உங்கள் கருத்துக்களை பகிர்ந்துக் கொள்ளவும் சமூக வலைத்தளங்களில் எங்களை பின்தொடருங்கள்.
Follow @Google News: கூகுள் செய்திகள் பக்கத்தில் நமது Search Around Web என்ற Tamil இணையதளப் பக்கத்தை இங்கே க்ளிக் செய்து ஃபாலோ செய்யுங்கள். அனைத்து ட்ரெண்டிங் செய்திகளை உடனுக்குடன் பெறுங்கள்…
SHARE
தொடர்பான செய்திகள்
லேட்டஸ்ட் நியூஸ்
subscribe to our best newsletters
Download Mobile App
