இனி கல்வி, வேலைவாய்ப்பில் 77% இட ஒதுக்கீடு.. ஜார்க்கண்ட் அரசு அதிரடி அறிவிப்பு!!

எஸ்சி, எஸ்டி, பிற்படுத்தப்பட்டோர் மற்றும் பொருளாதாரத்தில் பின்தங்கிய பிரிவினருக்கு மாநில அரசு வேலைகளில் 77 சதவீத இடஒதுக்கீடு வழங்குவதற்கான முன்மொழிவுக்கு ஜார்கண்ட் அரசு ஒப்புதல் அளித்துள்ளதாக தகவல் வெளியாகியுள்ளது.

முதல்வர் ஹேமந்த் சோரன் தலைமையில் நடைபெற்ற மாநில அமைச்சரவை கூட்டத்தில், ஓபிசி இடஒதுக்கீட்டை தற்போதைய 14 சதவீதத்தில் இருந்து 27 சதவீதமாக உயர்த்தியுள்ளது.

மேலும் ஹேமந்த் சோரன் தலைமையிலான அரசாங்கம், 1932 நிலப் பதிவேடுகளைப் பயன்படுத்தி உள்ளூர் குடிமக்களைக் கண்டறியும் திட்டத்திற்கும் ஒப்புதல் அளித்துள்ளது.

1932 ஆம் ஆண்டு பிரிட்டிஷ் அரசாங்கம் கடைசியாக நடத்திய நில அளவை உள்ளூர் மக்களை வரையறுக்கும் அடிப்படையாக பயன்படுத்த வேண்டும் என்ற பழங்குடியினரின் கோரிக்கையின் பின்னணியில் இந்த முடிவு எடுக்கப்பட்டது.

"எஸ்சி, எஸ்டி, பிற்படுத்தப்பட்ட வகுப்பினர், இதர பிற்படுத்தப்பட்டோர் மற்றும் பொருளாதாரத்தில் பின்தங்கிய பிரிவினருக்கு 77 சதவீத இடஒதுக்கீட்டிற்கான ஜார்க்கண்ட் இடஒதுக்கீடு சட்டம், 2001 இல் திருத்தம் செய்வதற்கான இடஒதுக்கீட்டு மசோதாவுக்கு அமைச்சரவை ஒப்புதல் அளித்துள்ளது" என்று அமைச்சரவை செயலாளர் வந்தனா தாடெல், அமைச்சரவை கூட்டத்திற்கு பிறகு செய்தியாளர்களிடம் கூறினார்.

இந்த மசோதாவை அரசியல் சாசனத்தின் ஒன்பதாவது அட்டவணையில் சேர்க்க மத்திய அரசிடம் மாநில அரசு கோரிக்கை வைப்பது என கூட்டத்தில் முடிவு செய்யப்பட்டது.

முன்மொழியப்பட்ட வேலை இடஒதுக்கீடு கொள்கையில், எஸ்சி சமூகத்தின் உள்ளூர் மக்களுக்கு 12 சதவீதம், எஸ்டி 28 சதவீதம், மிகவும் பிற்படுத்தப்பட்ட வகுப்பினர் 15 சதவீதம், இதர பிற்படுத்தப்பட்ட வகுப்பினர் 12 சதவீதம் மற்றும் பொருளாதாரத்தில் நலிவடைந்த பிரிவினருக்கு 10 சதவீதம் இட ஒதுக்கீடு வழங்கப்படும்.

தற்போது, ​​ஜார்க்கண்டில் எஸ்டியினருக்கு 26 சதவீத இடஒதுக்கீடும், எஸ்சிகளுக்கு 10 சதவீத இடஒதுக்கீடும் உள்ளது குறிப்பிடத்தக்கது.

இதர பிறப்படுத்தப்பட்டோர் தற்போது மாநிலத்தில் 14 சதவீத இட ஒதுக்கீட்டைப் பெறுகிறார்கள். மேலும் அதை அதிகரிப்பது 2019 ஆம் ஆண்டில் ஆளும் கூட்டணி--ஜேஎம்எம்-காங்கிரஸ்-ராஷ்ட்ரீய ஜனதா தளம் (ஆர்ஜேடி) உட்பட அனைத்து முக்கிய கட்சிகளின் தேர்தல் வாக்குறுதியாக இருந்தது குறிப்பிடத்தக்கது.

ஜார்க்கண்ட் காங்கிரஸ், ஓபிசியினருக்கு அரசு வேலைகளில் 27 சதவீத இடஒதுக்கீட்டை வலியுறுத்தி, இது ஒரு வரலாற்று நடவடிக்கை என்றும், வேலைக்காக பிற மாநிலங்களுக்கு மக்கள் இடம்பெயர்வதைத் தடுக்கும் என்றும் கூறியது.

'தமிழகத்தில் காவல் நிலைய மரணங்கள் இல்லை' - டிஜிபி சைலேந்திரபாபு பேச்சு..!

Follow @Google News: கூகுள் செய்திகள் பக்கத்தில் நமது Search Around Web என்ற Tamil இணையதளப் பக்கத்தை இங்கே க்ளிக் செய்து ஃபாலோ செய்யுங்கள். அனைத்து ட்ரெண்டிங் செய்திகளை உடனுக்குடன் பெறுங்கள்…